Ako si Pulang

ANG PAALALA SA KALSADA bakit mo tatawirin ang isang lansangan kung tingin mo'y magdudulot ng kamatayan mayroon doong babala, sundin lang iyan pag nabundol ka ba'y kaylaking katangahan? huwag sayangin ang buhay, dapat mag-ingat huwag magyabang na malakas ka't maingat sasakya'y di lata, katawa'y di makunat bawat babala'y dapat ipagpasalamat di ba't kaylaking babala nang binasa mo ang  "Bawal Tumawid. May Namatay Na Dito" madaling intindihin, wikang Filipino pag di mo unawa, banyaga ka ba rito? pag babala:  "Bawal bumaba" , e, di huwag! pag babala:  "Bawal lumiko" , e, di huwag! pag babala:  "Bawal tumawid"  e, di huwag! paano pag  "Bawal umutot!"  anong tawag? huwag maging tanga, huwag basta tumawid may tulay naman, dumaan doo'y matuwid kung nagmamadali ka, dapat mong mabatid na bawat paalala'y mag-ingat ang hatid - gregoriovbituinjr 11.06.2025

UPANG DI MASAYANG ANG WI-FI dahil sa wi-fi, dapat may ma-upload akong tulâ nang di masayang ang wi-fi na binayarang sadyâ  buwan-buwan, at kaysaya na kung may nalilikhâ tula bawat araw, isa, dalawa, tatlo pa ngâ may tulâ na agad pagmulat sa madaling araw mula sa napanaginipang gubat na mapanglaw rumagasâ, bahâ, nakita, nasuri, natanaw dahil sa wi-fi, mag-upload ay misyong agap-galaw isusulat, ia-upload yaong tulang nangusap bakit kaybagal ng hustisya sa mga mahirap habang may due process sa mga pulitikong korap dapat makapag-upload, wi-fi ay gamiting ganap ang tula't wi-fi ang komunikasyon ko't koneksyon sa daigdig mula paggising, pagmulat, pagbangon iba't ibang isyu ng masa'y ilantad ang misyon samutsaring tulâ ng makata'y i-upload ngayon kayâ wi-fi ay bigyang halaga, isang tungkulin iyon muna'y bayaran, kaysa bumiling pagkain kung paano popondohan ito'y pakaisipin  para sa abang makatang walâ sa toreng garing - gregoriovbituinjr. 11.06.2025

PAKSÂ SA MADALING ARAW ako na'y may tulâ paggising sa madaling araw kayrami kasing ideyang sa diwa'y nagsilitaw samutsaring paksâ, gumagalaw, di gumagalaw: trapik, langgam, pusà, rali, bulalakaw, bakulaw bato, batugan, basâ, basahan, handâ, handaan dala, dalag, dalaga, binat, binatà, ginatan puto, puta, puti, lansa, lansangan, una, unan talatà, taludtod, taludturan, tugmâ, tugmaan pag-iisip, pandiwa, paglilimi, pagninilay paglalakad ng kilo-kilometro, paglalakbay pakikisama, pagkakaisa, paghihiwalay saya, hagikhik, libog, nasa, dusa, dukhâ, lumbay ga, gara, garapa, garapata, kayraming paksâ kinawat na pondo sa flood control, tao'y binahâ ilang minutong ulan, nagbabahâ, bumabahâ bakit mga trapong korap ay naboto pang sadyâ - gregoriovbituinjr. 11.06.2025

PAGPAPAKAIN SA IBA PANG PUSÀ batid daw ng pusà kung sino ang mabait na maaaring magpakain sa kanila minsan, darating ako, sila'y nakatingin baka may pasalubong akong tira-tira mahirap din namang sila'y ipagtabuyan natutuwa nga ako't may sumasalubong pag-uwi ko galing sa maraming lakaran natirang ulam bigay ko sa mga iyon pag bibili o magluluto ng pagkain iniisip na ring sa kanila'y magtira kaya di lang ako ang kakain, sila rin lalo't sa kalsada lang sila nakatira ibinubulong ko nga sa kanila lagi bantayan ang bahay, may dala akong ulam na basta meron ako, sila'y kabahagi tiyak, gagaan na ang aking kalooban - gregoriovbituinjr. 11.05.2025 * mapapanood ang munting bidyo sa kawing na:  https://www.facebook.com/share/v/1W2NKyeJLn/  

ANG IKATLO KONG TIBUYÔ natutunan ko kay Itay ang magtipid sa tibuyô isang aral iyong tunay sa puso't diwa'y lumagô maganda muling simulan ang magtipid sa tibuyô sampung piso lang ang laman na balang araw, lalagô ikatlo ito sa akin una'y nasa isang bahay nasa tatlong libo na rin nang mapunô iyong tunay ang ikalawa'y nawalâ nasa dalawang libo na noong bahay ay ginawâ umuwi ako'y walâ na sana, ikatlong tibuyô ay mapunô ko ng barya bente pesos, tigsasampû tiyagâ lamang talaga - gregoriovbituinjr. 11.04.2025 * tibuyô - salitang Batangas sa Kastilang alkansya

PRIBATISASYON AT KORAPSYON  pribatisasyon at korapsyon kambal na buwayang lalamon sa bayan, para ring buwitre o mga ahas na salbahe masa'y dinala sa ayuda namayagpag ang dinastiya sinapribado ang NAIA tila NHA pribado na EO 34, 4PH ngâ na di pala para sa dukhâ may PAG-IBIG, di pwede walâ pribatisasyon na ring sadyâ sa R.A. 12216 ngâ nasa relokasyon kawawâ pag bahay ng dukha'y mawalâ dahil di nagbayad ng akmâ pati RA 12252 na pinirmahan ng pangulo 99 years upa ng dayo sa mga lupa natin dito krisis na ito'y alpasan na baguhin natin ang sistema patuloy na mag-organisa sistemang bulok, alpasan na! - gregoriovbituinjr. 11.04.2025 * tulang nilikha at binigkas ng makata sa pagtitipon ng mga manggagawa sa UP SOLAIR (School of Labor and Industrial Relations)

ANG BUHAY AY ISANG PAGLALAKBAY ang buhay ay isang paglalakbay tulad ng kinathang tula'y tulay sa pagitan ng ligaya't lumbay sa pagitan ng bulok at lantay sa pagitan ng peke at tunay nilalakad ko'y mahabang parang lalampasan ang anumang harang pahinga'y adobo at sinigang muli, lakad sa gubat at ilang bagamat sa araw nadadarang tao'y pagkasanggol ang simulâ sunod mag-aaral mulâ batà hanggang magdalaga't magbinatâ ikakasal habang talubatâ panaho'y lilipas at tatandâ ang mahalaga rito'y paano isinabuhay kung anong wasto lalo na sa pagpapakatao at pakikipagkapwa sa mundo habang ginagawa anong gusto di ang pagkamal ng kayamanan o ng pribadong ari-arian na kinurakot sa kabang bayan yamang pagkatao'y niyurakan yamang di dala sa kamatayan - gregoriovbituinjr. 11.04.2025

MACHIAVELLIAN DAW BA ANG MGA KURAKOT? Machiavellian daw ba ang mga kurakot? sa pulitika'y di dapat lalambot-lambot leyon at soro ang liderato ng buktot na dapat masa sa ulo'y kakamot-kamot masang sunud-sunuran at di pumapalag bigyan lang ng ayuda, sila na'y panatag masa'y bubulong, di lantad kung magpahayag mata'y pipikit kahit maraming paglabag tulad ng mga tipikal na pulitiko laging bilugin ang ulo ng mga tao kahit gumawa ng krimen upang umano sa mga ambisyong pampulitika nito kaya nga nagnanakaw sa kaban ng bayan iyang mga buwayang walang kabusugan na sa galit ng masa'y walang pakialam dahil sila'y may kamay na bakal daw naman dapat ilantad ang gawi ng mga korap dahil sa bansa, sila ang mga pahirap mga trapo'y ibagsak ang dapat maganap upang maitayo ang lipunang pangarap - gregoriovbituinjr. 11.03.2025 * Ang taga-Florence na si Niccolo Machiavelli ang awtor ng The Discourses, at ng The Prince na political treatise hinggil sa pamumuno

IKULONG LAHAT NG MGA KURAKOT patuloy nating ibulong ang isyu o kaya'y ipagsigawan na ito upang maraming makaalam nito upang sumama sa pagkilos dito sadyang nakapanginginig mabatid ang ginagawa nilang paglulubid ng buhangin na animo'y makitid ang kaisipan ng masang kapatid ay, guniguni pala ang flood control habang mga bulsa nila'y bumukol katakawan nila'y sadyang masahol pagkat buhay ng masa'y naparool tumindi talaga ang kahirapan pati na pagbabaha sa lansangan masa'y dinala nila sa kangkungan bansa'y tinangay nila sa putikan ang mga tulog pa'y ating gisingin ang mga gising na'y organisahin isyung ito'y ipaliwanag man din sa masang galit nang hustisya'y kamtin ikulong lahat ng mga kurakot na pati hustisya'y binabaluktot ikulong na ang mga trapong buktot ikulong lahat ng tuso't balakyot - gregoriovbituinjr. 11.03.2025

HULING KANDILÂ NGAYONG GABI huling gabi ngayon ng Undas at trabaho na naman bukas huling kandilâ ngayong gabi ay tahimik ko nang sinindi subalit lalagi ko pa ring ang sinisinta'y gunitain at kumathâ ng tulang tulay sa kanya't tanging inaalay di pa rin ako makatulog katawan sana'y di mahulog kundi maging malusog lagi nang matupad ang mga mithi nasasadiwà kita, irog dagat man ay kati o taog lalagi ka sa pusò, sinta sa bawat gabi at umaga - gregoriovbituinjr. 11.02.2025

PAGLABAN SA KURAKOT ano pang dapat gawin kundi ang kumilos laban sa kaapihan at pambubusabos laban sa sanhi kayâ bayan ay hikahos  laban sa burgesyang sa masa'y nang-uulos laban sa mga pulitikong budol-budol laban sa mga nasangkot sa ghost flood control laban sa mga trapong ang bulsa'y bumukol na pondo ng bayan ay ninakaw ng asshole laban sa buwayang wala nang kabusugan laban sa buwitreng ugali'y katakawan laban sa ahas na punò ng kataksilan laban sa hudas para lang sa kayamanan O, taumbayan, iligtas ang bansang ito laban sa pangungurakot ng mga trapo laban sa pagnanakaw ng buwis at pondo ng bayan, kurakot ay ikulong na ninyo! - gregoriovbituinjr. 11.02.2025 * litrato kuha sa Bantayog ng mga Bayani

LUKSONG BAKA, LUKSONG BABOY luksong baka / ang laro ng / kabataan noong wala / pa ang pesbuk, / kainaman laro nila / ng katoto / sa lansangan larong ito / ba'y iyo pang /naabutan? ngunit iba / ang laro ng / mga trapo nilalaro'y / pagnanakaw / nitong pondo ng kawawang / bansa, na di / na sekreto binababoy / ng kurakot / ang bayan ko luksong baboy / pala yaong / nilalarò nitong lingkod / bayang tila / ba hunyangò habang masa / sa ayuda / inuutô ninakawan / sila'y di pa / natatantô lumulukso / ang kawatan / pakunwari may insersyon, / kickback, lagay / at paihi kabang bayan / pala yaong / binuriki bilyong pisong / nakaw, masa'y / dinuhagi na kung di pa / nagbabaha / sa kalsada di nabuking / na binaboy / ang sistema O, bayan ko, / binabahâ / kang talaga mga trapong / kurakot ay / ikulong na! - gregoriovbituinjr 11.02.2025 * mga larawan mula sa google

SABAW NG TALBOS NG KAMOTE'T OKRA pinainit na ang tiyan nitong umaga ininom ang mainit na sabaw ng okra at talbos ng kamote, na di man malasa ay tiyak na ito'y pampalakas talaga nagising kasi kaninang madaling araw sa labas ng bahay ay may nakitang ilaw nagsindi palang kandila ang kapitbahay na hanggang sa ngayon ako pa'y nagninilay di pa makatulog gayong nais umidlip mamaya, pagod kong mga mata'y pipikit ipapahinga ang katawan, puso't isip upang mga tula sa diwa'y iuukit kailangang laging malusog ang katawan laging isipin ang lagay ng kalusugan kaya talbos ng kamote't okra'y mainam na ulam pati sabaw nitong pang-agahan - gregoriovbituinjr. 11.02.2025

APAT NA KANDILA SA LABAS NG BAHAY madaling araw, naihi ako nang makita sa labas ng bahay may nakasinding kandilâ, naku salamat sa sinumang nag-alay agad kong nilitratuhan iyon kasama yaong dalawang pusà salamat po sa nagsindi niyon alay sa kabiyak kong nawalâ  kapuso't kapamilyang namatay ngayong All Souls Day, inaalala si Dad, sina Kokway, Libay, Nanay Sofia, nagunita talaga matapos tulang ito'y kathain ako'y pipikit na't maiidlip at mamaya ay muling gigising na matiwasay ang puso't isip - gregoriovbituinjr. 11.02.2025

UNANG ARAW NG NOBYEMBRE, 2025 ngayon ang Unang Araw ng Nobyembre inyo bang ramdam kung may nangyayari? wala pang nakukulong na salbahe kurap at tusong pulitiko, GRABE! 'ghost' flood control project ng mga imbi magmumulto pa ba hanggang Disyembre? nagtatakipan ba ang mga guilty? sa ganyan, anong iyong masasabi? para sa akin, ikulong na iyang mga kurakot sa pondo ng bayan baka bumaha muli sa lansangan ang galit na galit na sambayanan buti may due process ang mga kupal pag dukha, kulong agad, di matagal kung mangyari ang Indonesia't Nepal dahil iyan sa hustisyang kaybagal - gregoriovbituinjr. 11.01.2025

ANG EMOJI, MASAYA O NAGTATAWA? maselan ang isyu subalit tingnan ang emoji parang pinagtatawanan ang mga namatayan  na pamilyang tinokhang, nakatawa ang emoji "buti nga sa kanila", tila pinagsisigawan ganyan nilang estilo'y sadyang nakababahalà nagsasaya nga ba sila o sila'y nagtatawa? buti pa ang hinlalaki at pusò pagkat tandâ nito'y batid mo, di tulad ng emoji na HA-HA maselang isyu, emoji mo'y HA-HA, ano iyan? parang gustong-gusto nilang pinapaslang ang tao para bang uhaw sa dugô, wala sa katinuan gayong editoryal ay isang mahalagang isyu walang due process, tao'y pinaslang na tila baboy ang nag-atas ng pagpaslang ngayon na'y nakapiit habang mga kaanak ngayong Undas nananaghoy na sana asam na hustisya'y kanilang makamit - gregoriovbituinjr. 11.01.2025 * ulat mula sa kawing na:  https://www.facebook.com/photo/?fbid=1311509767679566&set=a.602294451934438  

PAGSASALIN noong nakaburol si ama, ako'y nagsasalin o translasyon mula Ingles hanggang sa wika natin naospital at namatay si misis, nagsasalin ngayong Undas, mayroon ding tinatapos na salin anupa't pagsasalin na'y akibat na trabaho ng inyong lingkod, bahagi na niring pagkatao trabahong maselan, konsentrasyon talaga ito lalo't isinasalin ay libro o dokumento pagsasalin na'y ginagawang buong katapatan sa ganyang larangan nakilala ang kakayahan ekstrang trabaho ng pultaym na tibak na Spartan bukod pa sa gawaing magsulat sa pahayagan kung kumita ng konti, upang mabuhay na'y sapat subalit sa utang ay di magkakasyang pambayad sa tiwalà, ako'y lubos na nagpapasalamat kahit Undas, ang matapos ang salin yaring hangad - gregoriovbituinjr. 11.01.2025

PAGGUNITÂ nasa pangangalagà na ni Bathalà silang mga mahal nating namayapà pinapanatag ng gayong paniwalà yaring pusò sa kanilang pagkawalâ kaya ngayong Undas ay alalahanin ang bawat pag-ibig na dinanas natin mula sa mahal na nawalâ sa piling mga tinig na ibinulong ng hangin alaalang nakaimbak sa isipan habang anghel ay nagsisipag-awitan tulad ng mga ibon sa kaparangan tulad din ng pagbigkas sa panulaan naaalala sa naiwang litrato na tila buhày pag pakatitigan mo silang bahagi nitong búhay sa mundo tuwing Undas ay gunitaing totoo - gregoriovbituinjr. 11.01.2025

BAKAS NG KAHAPON narito't naiwan pa ang bakas ng nakaraan, ng nakalipas tulad ng kaalaman ng pantas kung ano ang kakaharaping bukas sa bakas man ay may tubig-bahâ dahil sa mga tiwaling sadyâ na mga kurakot na kuhilà kayâ ang bayan ay lumuluhà hanggang ngayon aking naninilay di basta magpatuloy sa buhay na sarili lang isiping tunay kumilos pag di na mapalagay maging bahagi ng kasaysayan at mag-iwan ng bakas sa daan na sa buhay na ito ay minsan para sa hustisya'y nakilaban - gregoriovbituinjr. 11.01.2025