SA IKAAPATNAPUNG ARAW NG PAGLISAN
tigib pa rin ng luha ang pisngi
talagang di pa rin mapakali
manhid ang laman, walang masabi
nang mawala na ang kinakasi
siyang naging musa ng panitik
sa puso'y inukit at nilalik
narito man akong walang imik
siya sa diwa ko'y nakatitik
tinitigan ko ang kalangitan
habang umiihip ang amihan
isa nang tala sa kalawakan
yaong kabiyak, tanging katipan
isa siyang kaybuting asawa
karugtong ng buhay ko't pag-asa
sa mga taon ng pagsasama
salamat sa lahat, aking sinta
- gregoriovbituinjr.
07.21.2025
* June 11 - July 21 = 40 days
Walang komento:
Mag-post ng isang Komento