Napaaga ng dating sa U.P.

NAPAAGA NG DATING SA U.P.

napaaga ng dating sa U.P.

subalit ano pang dapat gawin

ah, marahil ay magmuni-muni

hinggil sa sistemang babaguhin

sa harap ng marker ng bayani

lugar kung saan siya bumagsak

sa manggagawa dapat masabi

sistemang bulok ating ibagsak

trapo't elitistang mapanghamak

ay dapat lang labanan nang ganap

sa kapitalismong mapangyurak

ipalit ay lipunang pangarap

mamaya'y magsisidatingan na

ang mga kasamang matatatag

sa laban, muling nagkita-kita

upang makinig at magpahayag

- gregoriovbituinjr.

02.06.2024

* kuha ng makatang gala sa gilid ng UP Bahay ng Alumni, sa ika-23 anibersaryo ng pagpaslang sa lider-manggagawang si Ka Popoy Lagman; alas-dos ay nasa venue na, alas-tres pa ang usapang dating ng mga kasama

Salin ng tatlong akdang Lenin

SALIN NG TATLONG AKDANG LENIN

Mamayang hapon sa isang munting pagtitipon, ipamamahagi ko ang tatlong akdang aking isinalin: ang sulatin ni Lenin na 3 sources and 3 component parts of Marxism, ang akda ni Leon Trotsky na Talambuhay ni Vladimir Ilyich Lenin, at ang akda ni Ho Chi Minh na Ang Landas na Gumiya sa Akin sa Leninismo.

Magdadala rin ako ng munting lata na ang nakasulat: "Munting ambag sa gawaing translation at dyaryo. Maraming salamat po!" Ito'y upang makapagparami pa ng gawa, at maraming mabahaginan nito. Mahirap din kasi ang pultaym, pulos sariling gastos at walang balik na salapi. Kaya mag-ambag ng munting kakayanan. Pasensya na.

Ito ang munti kong tula hinggil dito:

ANG TATLO KONG SALIN NG AKDANG LENIN

may sulatin si Lenin na isinalin ko:

Ang Tatlong Pinagmulan at Magkakasamang

Bahagi ng Marxismo, kaygandang basahin

na handog sa mga aktibistang tulad ko

ikalawa'y ang sinulat ni Leon Trotsky:

ang Talambuhay ni Vladimir Ilyich Lenin;

ikatlo'y Ang Landas na Gumiya sa Akin

sa Leninismo, na sinulat ni Ho Chi Minh

sa pagtitipon mamaya, abangan ninyo

O, kapwa Leninista, kapwa aktibista

munting ambag lang upang maparami ito

ay sapat na para sa pultaym na tulad ko

ngayong taon, sentenaryo ng kamatayan

ni Lenin kaya mga akdang saling ito

sana'y mabasa at mahanguan ng aral

tungong panlipunang pagbabago, salamat

- gregoriovbituinjr.

02.06.2024

Pagtunganga

PAGTUNGANGA

napatunganga muli sa kawalan

tila nahipan ng hanging amihan

animo gagawin ay di malaman

habang naglalaro ang nabungaran

paano ba mamatehin ang hari

ng sablay na laging napapangiwi

ang reyna at tore'y di mo mawari

habang piyon ay nagtangkang magwagi

tila nanonood lamang sa wala

di pa lumitaw ang kislap sa diwa

baka dumating ang mutya mamaya

ay biglang matulala, mapatula

para bang naritong nananaginip

sa diwa'y walang anumang mahagip

bagamat sa puso'y may halukipkip

na tila baga walang kahulilip

- gregoriovbituinjr.

02.05.2024

Palathaw pala'y palakol

PALATHAW PALA'Y PALAKOL

akala ko ang tanong ay PALAHAW

sa krosword, iyon pala ay PALATHAW

Pa, La, at Wa, na lang ang natatanaw

PALUWAL kaya ang isagot ko raw

tamang sagot ay hinanap kong tunay

na tinawid pa'y bundok, dagat, tulay

nang matagpuan, ako'y napanilay

ito sa akda'y gagamiting tunay

pagkat nakita ko sa diksyunaryo

kung anong wastong kahulugan nito

at nakita rin ang hinahanap ko

ay, PALAKOL, pansibak pala ito

bagong salita, hindi pala, luma

lumang salitang bagay sa pagtula

pati sa dula't kwentong makakatha

salamat, krosword, ito'y sinariwa

- gregoriovbituinjr.

02.05.2024

* palathaw - tanong sa 1 Pahalang

* palathaw - 1. [Sinaunang Tagalog] manipis na itak; 2. maliit na palakol at may maikling hawakan

- mula sa UP Diksiyonaryong Filipino, p. 892

Pamanhik

PAMANHIK

anibersaryo ng pamamanhikan

ang Fil-Am War, kaysarap pag-isipan

na dalawang puso'y nasa pagitan

ng kawalang digma't kapayapaan

gerang Pilipino-Amerikano

nang mamanhikan, Pebrero a-kwatro

civil wedding nama'y sumunod dito

Pebrero Katorse nang gawin ito

unang kasal sa tribu ang sinundan

ikatlo'y church weddding, makasaysayan

na sadyang aming itinaon naman

sa anibersaryo ng Katipunan

sunod, pangalawang kasal sa tribu

na nataon lang na anibersaryo

ng isang grupong rebolusyonaryo

na di ko na papangalanan dito

anupa't ang petsa ng pamanhikan

at kasal ay pawang makasaysayan

dalawang puso'y nagkaunawaan

na patuloy silang mag-iibigan

isa pang plano'y kasal sa Kartilya

ng Katipunan, kumbaga'y panglima

sa mga dinaanang seremonya

ngunit ito'y plano pa lang, wala pa

- gregoriovbituinjr.

02.04.2024

Kaytagal

KAYTAGAL

kaytagal kong pinatila ang ulan

habang patungo sa dalampasigan

kaytagal kong naglayag sa kawalan

upang ang aking sinta'y masilayan

kaytagal kong inisip bawat paksa

sa kabila ng lumbay ko't pagluha

kaytagal kong hinanap ang salita

na angkop sa bawat kong kinakatha

kaytagal kong tinasahan ang lapis

upang iguhit ang leyong mabangis

kaytagal kong inasam na matiris

ang kutong sa ulo'y bumubungisngis

kaytagal kong ang diwa'y ginigising

habang sa banig ay nakagupiling

kaytagal kong asam ang paglalambing

ng rosas na kaysarap makapiling

ah, kaytagal ko ring naging bubuyog

sa bulaklak na labis kong inirog

kaytagal ding ang araw ay lumubog

upang tula sa sinta'y maihandog

- gregoriovbituinjr.

02.04.2024

Dalawa sa isinalin kong akda

DALAWA SA ISINALIN KONG AKDA

Maikling sanaysay at tula ni Gregorio V. Bituin Jr.

Marami na rin akong akda at tulang isinalin. At kalakip nga sa litratong ito ang dalawa sa mga iyon - ang akda nina Leon Trotsky at Ho Chi Minh. Naisalin ko na ito ilang taon na ang nakararaan. Subalit nais kong bigyang pansin ang mga ito ngayon dahil ngayong 2024 ang sentenaryo ng kamatayan ni V.I. Lenin.

Isinalin ko mula sa wikang Ingles ang "Talambuhay ni Vladimir Ilyich Lenin" na sinulat sa wikang Ruso ni Leon Trotsky, subalit may salin sa Ingles, kaya ating nabatid at nabasa ang kasaysayan ni Lenin. Ang ikalawa'y ang sulatin ng rebolusyonaryong Vietnames na si Ho Chi Minh, na pinamagatang "Ang Landas na Gumiya sa Akin sa Leninismo" na isinalin rin mula sa Ingles. Nang matapos ang salin ay ginawa kong pamphlet na maipapamahagi.

Ang dalawang aklat naman sa itaas ng dalawang salin ay ang "Lenin's Last Struggle" na nabili ko sa aklatan sa Baguio City noong 2019, habang ang "Gabay sa Pag-aaral ng Leninismo" ay aklat na inilathala noong 2007 ng Aklatang Obrero Publishing Collective, na pinamamahalaan ng inyong lingkod. Gayunman, ang nakataas-kamao sa baso ay hindi si Lenin kundi si Ka Eddie Guazon, ang unang pangulo ng Kongreso ng Pagkakaisa ng Maralitang Lungsod (KPML). Minsan, masarap ding magkape habang nagsusulat.

Ginawan ko ng munting tula ang dalawang salin:

SALIN NG AKDA HINGGIL KAY LENIN

maraming akdang dapat isalin sa Filipino

sa gawaing ito'y tila ba naipako ako

nang di sadya kaya pinagbutihan nang totoo

heto, tuloy-tuloy na ako sa tungkuling ito

kaya dalawang akda hinggil kay Vladimir Lenin

at sa Leninismo'y pinagtyagaan kong isalin

baka maraming katotohanang dapat alamin

at matutunan ng kauri't kababayan natin

sa atin ba'y sino si Ho Chi Minh? si Leon Trotsky?

sila ba sa bansa nila'y tinuring na bayani?

sila ba sa manggagawa'y dapat ipagmalaki?

silang si Lenin ay kilalang sa uri nagsilbi?

kaya aking isinalin ang kanilang sinulat

upang api't pinagsamantalahan ay mamulat

sa sistemang bulok ay paano lalaya lahat

at isang lipunang patas ay maitayong sukat

02.04.2024