Pagsisilbi sa pamilya

PAGSISILBI SA PAMILYA

O, ander de saya na ba ako

kung sa bahay ay naglalampaso

ng sahig, naghuhugas ng plato,

basura'y sa trak nilalagay ko

madalas ako ang nagluluto,

naglalaba rin ng aming baro,

binabanlawan nang di bumaho,

sinasampay ko't pinatutuyo

aba'y di naman ako alila

o alipin dahil walang-wala

kundi tungkulin iyong dakila

na sa pamilya'y kusang ginawa

wala na ba akong pakisama

kung di makitagay sa barkada

masasabi bang ander de saya

pag pinagsilbihan ang pamilya

ako ang haligi ng tahanan

habang asawa ko'y ilaw naman

mga anak ang kaligayahan

sino pa bang dapat magtulungan

- gregoriovbituinjr.

02.03.2024

Liham ng pagsinta

LIHAM NG PAGSINTA

"Love note sent loves!" ang kinalabasan

ng pinagdugtong na salitaan

sa Word Connect, iyon ang iniwan

kaya puso'y napatula naman

minsan, kailangan mong sulatin

ang nilalaman nitong damdamin

ipabatid sa liham ang lihim

siya'y iyong pakamamahalin

maraming lihim ang iyong liham

sa kanya'y iyong ipinaalam

pag nabigo'y huwag ipagdamdam

magalang na sabihing "Paalam..."

pag-ibig ay sadyang mahiwaga

kaya makata'y napapatula

mula sa puso'y kanyang nalikha 

ang tulang alay sa minumutya

- gregoriovbituinjr.

02.02.2024

Reserbadong upuan

RESERBADONG UPUAN

reserbado ang upuan

pang-espesyal o mayaman

marahil may katungkulan

o mukhang kagalang-galang

minsan, ganyan din sa buhay

may silya para kay nanay

o sa amang tumatagay

upang sila'y mapalagay

may upuan sa palasyo

nakalaan sa pangulo

pinag-aagawan ito

ng mga kuhila't tuso

may laang silya din kaya

para sa obrero't dukha

ito'y dapat maihanda

tungong lipunang malaya

- gregoriovbituinjr.

02.02.2024

Be honest, kahit nasa dyip

BE HONEST, KAHIT NASA DYIP

sa nasakyan kong dyip kanina

ay katapatan ang tema:

"kalimutan na ang lahat

huwag lang ang bayad"

"barya lang po sa umaga"

"pakiabot po ang bayad"

"always be honest"

di ba? kaygaganda ng tema

sa isa namang dyip kahapon:

"god knows JUDAS not pay?"

kaya magbayad ng pamasahe

huwag mong subukang mag-1-2-3

alang-alang sa mga tsuper

na may binubuhay ding pamilya

tulad mo, be honest!

salamat, mamang tsuper, sa paalala

- gregoriovbituinjr.

02.01.2024

Entri sa patimpalak

ENTRI SA PATIMPALAK

nagtiis maghapon, mapadala lang

ang entri sa taunang patimpalak

hinggil sa panulaan nitong bayan

pagpasa ng entri ay kinagalak

pinangarap ng makatang magwagi

lalo't laging nagbabakasakali

inampalan sana siya'y mapili

bagamat ang pagsali'y di madali

kahit isang beses sana'y manalo

nang kakayaha'y kilanling totoo

bilang patunay ng tula't sebisyo

sa masa, bayan, sa uring obrero

mahaba-haba pa ang paglalakbay

kaya pinaghandaan itong tunay

pinagsikapan, talagang nagsikhay

nawa'y makamit niya ang tagumpay

- gregoriovbituinjr.

02.01.2024

Pagsuyo kay misis

PAGSUYO KAY MISIS

kung nagtampo si misis, aking susuyuin
tulad ng tandang na gumiri sa inahin
tulad ng leyon na leyona'y aakitin
tulad ng binata sa mutyang iibigin

lalabhan ko ang mga maruruming damit
lulutuin ang paborito niyang pansit
sa pinagkainan, ako ang magliligpit
o kaya'y tititigan ko siyang malagkit

hahandugan ko ng rosas at tsokolate
aalayan ng tulang kaygandang mensahe
ililibre ko rin siya sa pamasahe
hihingi rin ng tawad kung ako'y salbahe

lalambingin si misis ng buong pagsuyo
upang pag-ibig niya'y di naman maglaho

- gregoriovbituinjr.
01.31.2024

* litrato mula sa pahayagang Pilipino Star Ngayon

Isang buwan sinagutan

ISANG BUWAN SINAGUTAN

araw-araw ko ring sinagutan

ang larong Sudoku at Word Connect

naglaro sa selpon, nasiyahan

animo'y laban ng matitinik

bawat petsa ay may bagong laro

bawat araw ay may sinasagot

isang buwang laro na'y nabuo

sa diwa'y may buting naidulot

anang doktor, ito'y maganda raw

na panlaban sa Alzheimer's disease

sagutan lang ito araw-araw

pagkaulyanin ay maaalis

tara na, laruin ang Sudoku

at Word Connect, katoto't kasama

sa isip ay mabuting ensayo

at sa pakikisama'y maganda

- gregoriovbituinjr.

01.31.2024