Tatlong pritong tilapya

TATLONG PRITONG TILAPYA

kahapon, bumili ako ng tatlong isda
nang sa buong maghapon ay ulam kong sadya
trenta'y singko pesos bawat pritong tilapya
madalas, ganyan ang buhay nitong makata

ang isa'y inulam ko na kinagabihan
isa'y pinagsamang almusal, tanghalian
isa pa'y iuulam mamayang hapunan
madalas, ganyan kaming tibak na Spartan

hahaluan ng sibuyas, bawang, kamatis
upang sa kagutuman ay di na magtiis
ganyan man, di kami pulubi sa dalisdis
kundi tibak, kalaban ng nagmamalabis

tatlong pritong isda sa maghapon, magdamag
basta iwing katawan ay di mangangarag
na sa pagkilos, patuloy na nagsisipag
nang sistemang bulok ay tuluyang malansag

- gregoriovbituinjr.
02.09.2023

Nilay sa usapang FDC sa ZOOM

NILAY SA USAPANG FDC SA ZOOM

proyekto nila'y di lapat sa lupa

at naroon lang sa mga bathala

ang tao'y pinagwawalangbahala

ng uring kapitalista't kuhila

ano bang nararapat nating gawin

nang mga pader na ito'y banggain

ang sama-samang pagkilos ba natin

ay sapat upang sistema'y buwagin

RCEP at iba pa'y pangkanila lang

silang sa daigdig ay mapanlamang

ang globalisasyon ng mga dupang

ay paano nga ba mapapalitan

ilang nilay sa talakayan sa zoom

laban sa sistemang dulot ay gutom

nakikinig habang kamao'y kuyom

at bibig ay di dapat laging tikom

- gregoriovbituinjr.

02.09.2023

Uno

UNO

sa larong sudoku'y matalim ang pagkakatitig

tila idinuduyan sa madilim na daigdig

animo'y dinarama pati malalim na pintig

parang nakaalpas sa malagim na pagkayanig

isang numero na lang at buo na ang sudoku

numero uno ang isulat sa siyam na blangko

linya pababa't linya pahalang ay sagutan mo

dapat sa bawat linya'y walang parehong numero

minsan, pag nakita sa pahayagan, matutuwa

na sa bawat isyu'y isa lang ang nalalathala

mabuti na lang, may app na sudoku na nalikha

kaya nagsusudoku sa selpon pag walang gawa

kayhusay ng nag-imbentong nag-isip nang malalim

anang iba, sa SUnDOt-KUlangot ito nanggaling

sinakluban ng patpat ang binilot na pagkain

makunat, matamis, tingnan mo't ito'y siyaman din

isang larong nakapagbibigay ng kasiyahan

upang sa pagkasiphayo'y makawala rin minsan

habang nagninilay ay hinahasa ang isipan

sa larong itong kapaki-pakinabang din naman

isulat mo na ang uno, huwag nang patagalin

pag nabuo, may susunod pang larong sasagutin

pag gutom ang diwa'y ito ang aking kinakain

pag nadama'y kasiyahan, nakabubusog na rin

- gregoriovbituinjr.

02.09.2023    

Sa tinapayan

SA TINAPAYAN

habang madaling araw pa lang

naroon na sa tinapayan

gusto'y mainit na pandesal

at kape para sa almusal

laging maaga kung humimbing

at madaling araw gigising

upang maabutan ngang sadya

ang bagsakan sa talipapa

at bibili roon ng mura

dadalhin sa tindahan nila

na pag ibinenta'y may patong

upang sa kita'y may pandugtong

ganyan ang araw-gabing buhay

sa tinapayan na tatambay

- gregoriovbituinjr.

02.09.2023

Hapunan

HAPUNAN

sa aking lungga'y tigib ng lumbay

pagod sa mahabang paglalakbay

sa kawalan ay may naninilay

habang dito'y nagpapahingalay

at maya-maya'y maghahapunan

upang maibsan ang kagutuman

diwa'y tumatahak sa kawalan

di malaman ang patutunguhan

hanggang isa-isang isusubo

yaong mga ulam na niluto

hanggang unti-unti nang maglaho

yaong gutom at pagkasiphayo

babawiin ang nawalang lakas

tatahakin din ang ibang landas

upang kagutuman ay malutas

at maitayo'y lipunang patas

- gregoriovbituinjr.

02.08.2023

Pebrero

PEBRERO

ang buwan ng Pebrero'y pag-ibig

kaya raw nangangamoy pinipig

na si Maganda at si Makisig

ay talaga raw nagkakaniig

katorse'y araw ng mga puso

kaya ang diwata'y sinusuyo

pag-ibig na sana'y di maglaho

mahalagang ito'y laging buo

upang di gumuho ang pangarap

marating ang kabila ng ulap

ang lipunang dapat na malasap

ang ginhawang tila ba kay-ilap

ah, ngayon ay Pebrero na pala

imbes na dapat, kayraming sana

sana'y tuloy pa rin ang pagsinta

sana'y kamtin ang tunay na saya

- gregoriovbituinjr.

02.08.2023

Sa paglalakad

SA PAGLALAKAD

palakad-lakad kung saan-saan

baka ang hanap ay matagpuan

nag-uusisa ng kung anuman

baka sa loob ay makagaan

dahil ang hanap ay mahalaga

upang wala nang magsamantala

upang gintong sibuyas at luya

ay magmura't di na mapamura

mahirap mang kamtin ang pangarap

ay patuloy pa ring nagsisikap

mabatid lang ang dapat na sangkap

upang malasap ang tamang sarap

sa paglalakad ko'y nababatid

ang pakitungong di laging umid

kaysarap ng damang inihatid

pag nalampasan yaong balakid

- gregoriovbituinjr.

02.08.2023