Pinagkaitan

PINAGKAITAN

muli kong napansin sa isang pagtitipon

kung ano talaga ang pagtingin sa tula

hiniling ko mang bumigkas ng tula roon

ay nakalimutan, may tula mang hinanda

anong sakit niyon, sinarili ko na lang

buti pa ang mga grupo ng mang-aawit

nakapagtanghal, makata'y di napagbigyan

gayong paksa'y lapat, pagtula'y pinagkait

baka sa harap lang ng mahilig tumula

nararapat na aming katha'y iparinig

unawa na lang, kaysa magmukhang kawawa

ilathala na lang ang dapat isatinig

minsan, ganyan ang mapait na karanasan

kaya nang minsang may nag-anyaya sa akin

sa tulaan, iyon na'y aking tinanguan

kahit milya-milya pa ang layo sa amin

pagkat isang pambihirang pagkakataon

upang mabigyang katuturan ang sarili

kaya paghahandaan kong mabuti iyon

baka sa tulad lang nila ako may silbi

- gregoriovbituinjr.

02.08.2023

Pamasahe

PAMASAHE

payak lang naman ang panawagan

malimutan mo na ang magselpon

ngunit pamasahe'y huwag naman

haha, natamaan ka ba roon?

kung wala mang paki ang marami

alam ng tsuper sino nang bayad

subalit ang madalas mangyari

may di pala nakabayad agad

magbayad na nang di mapahiya

kahit magselpon, maging alerto

at baka sa agarang pagbaba

sigawan kang "Hoy, pamasahe mo!"

saka mo sasabihing "Sorry po!"

at saka itatago ang selpon

pagkapahiya'y sadyang siphayo

namula ka man ay huminahon

- gregoriovbituinjr.

02.08.2023

Almusal

ALMUSAL

tara nang kumain, kaibigan

ako naman ay iyong saluhan

at mainit-init pa sa tiyan

tarang kumain bago umalis

patungo sa papasukang opis

mahirap nang sa gutom magtiis

gaano man kasimple ang ulam

sa gutom nama'y nakakaparam

at sikmura'y di basta kakalam

pagkaing karaniwan at payak

nang di naman gumapang sa lusak

pag nabusog pa'y iindak-indak

huwag magpakagutom - ang payo

nang di makadama ng siphayo

- gregoriovbituinjr.

02.08.2023

Nadalumat

NADALUMAT

para akong nasusunog sa maapoy na dagat

pag nasagkaan ang aking prinsipyo bilang mulat

tila ba iniihaw ang kabuuan ko't balat

pag nababalewala ang diwa kong nadalumat

ako'y makatang laban sa pribadong pag-aari

sapagkat ugat ng kahirapan, nakamumuhi

ah, ayokong ibibilang sa naghaharing uri

sapagkat binabalewala ko ang minimithi

niyakap ko ang pagdaralita't buhay ng masa

simpleng pamumuhay at puspusang pakikibaka

kaming aktibistang Spartan ay iyan talaga

pag ako'y nagtaksil, noo ko'y lagyan na ng bala

dapat magkaroon ng makauring kamalayan

ang maralita, uring manggagawa, sambayanan

upang di iboto ang may dulot ng kaapihan

at pagsasamantala sa kawawa nating bayan

dapat nang magtulungan ang mga magkakauri

upang durugin ang tusong kanan at naghahari

iyang trapo, elitista, burgesya, hari, pari

na kapitalismo'y sinasamba nilang masidhi

makauring kamalayan ay itaguyod natin

dapat lipunang bulok ay palitan at baguhin

kamalayang makauri'y isabuhay, bigkasin

at lagutin ang tanikala ng pagkaalipin

- gregoriovbituinjr.

02.07.2023

Pagsasatinig

PAGSASATINIG

nais kong bigyan ng tinig ang mga walang tinig

at ang mga matagal nang ninakawan ng tinig

nais kong isiwalat ang kanilang mga tindig

nang sila'y magkaisa't talagang magkapitbisig

kayraming winalan ng tinig pagkat mga dukha

na minamata ng mga matapobre't kuhila

kayraming nilapastangang turing ay hampaslupa

na pinagsasamantalahan dahil walang-wala

kaya ayokong mayroong pribadong pag-aari

na ugat ng kahirapan at ng mapang-aglahi

nais kong karapatan ay igalang ng masidhi

at kamtin ang hustisyang panlipunang minimithi

sinasatinig ko ang isyu ng nahihirapan

kamkam ng iilan ang kanilang pinaghirapan

na uring manggagawa'y pinagsasamantalahan

na dukha'y tinanggalan ng bahay at karapatan

ito ang gawa ng tulad kong abang manunulat:

isatinig ang buhay at danas ng nagsasalat

na may lipunang makataong dapat ipamulat

na may matinong sistemang dapat kamtin ng lahat 

- gregoriovbituinjr.

02.07.2023    

Paksa

PAKSA

saglit nakatitig sa kawalan

katulad ng malimit asahan

anong paksa ang napupusuan

na may mahahagod na katwiran

tinitingala pa rin ang langit

mga ibon ay nagsisiawit

anong paksa kayang madadagit

na sa atin ay ipinagkait

maisasalin kaya ang tula

ng mga lumad sa aking lungga

anong katangian ng salita

ang pag nabasa dama'y ginhawa

anong paksa kayang nararapat

nang matuwa pag binasang sukat

may inaalat, may nasasalat

lalo't madalas pinupulikat

may mga paksang mula sa puso

pag sa diwata na'y nanunuyo

may paksang di ka na marahuyo

pag lalamunan na'y nanunuyo

may paksang anong sarap ng lasa

kamatis, sibuyas, bawang, luya

may di mahahawakan - ideya

ugali, karapatan, hustisya

- gregoriovbituinjr.

02.07.2023

Ka Popoy

 =

KA POPOY

dalawampu't dalawang taon na ang nakararaan

nang bigla kang nawala dahil ikaw ay pinaslang

ng mga salaring kaaway nitong sambayanan

dahil pinalakas mo ang 'yong pinamumunuan

taas-kamaong pagpupugay, lider at kasama

ang mga aral mo'y aming isinasapraktika

upang tuluyang baguhin ang bulok na sistema

at mawala ang pang-aapi't pagsasamantala

sinabi mong dapat class line, di mass line, ang tunguhin

ng uring manggagawang pagkakaisa'y kakamtin

ang pag-oorganisa ng uri ang adhikain

makauring kamalayan ay sadyang patampukin

sa mga aral at karanasan nga'y napapanday

kasama ng manggagawang sosyalismo ang pakay

tanging masasabi ko'y taospusong pagpupugay!

tinutuloy namin ang laban mo, kasamang tunay!

- gregoriovbituinjr.

02.06.2023