Tulang akrostik para kay A.P.Non

TULANG AKROSTIK PARA KAY A.P.NON

Ang kasalukuyang inspirasyon

Ng bayan: si Ana Patricia Non

Ang community pantry'y nilayon

Para walang masang nagugutom

Ang kanyang pantry'y alay ng loob

Tumutulong siyang kusang loob

Rinig niyang sa puso'y marubdob

Itong bayang sa gutom nalublob

Commitment sa pakikipagkapwa

Itong ginawa niyang talaga

At naging inspirasyon sa masa

Na pantry'y ginawa din ng iba

Oh, bagong inspirasyon ng bayan

Na laking tulong sa sambayanan

- gregoriovbituinjr.

Earth Day 04.22.2021

* litrato mula sa google

Ngayong Earth Day 2021

NGAYONG EARTH DAY 2021

Earth Day ay nagpapaalala

ng tahanan nating daigdig

ito'y alagaang tuwina

punuin natin ng pag-ibig

walang coal plants na sumisira

sa atmospera nitong mundo

walang polusyong lumulubha

at sa baga'y umaapekto

nagkalat na ang mga plastik

dagat ay puno na ng upos

mag-ekobrik at magyosibrik

bakasakaling makaraos

bawal na basura'y masunog

baka hininga'y di tumagal

kalikasan na'y nabubugbog

anong nakita nating aral?

alagaan ang kalikasan

at tanging tahanang daigdig

mga sumisira'y labanan

at dapat lang namang mausig

- gregoriovbituinjr.

04.22.21

Ipagdiwang ang tagumpay nina Lapulapu

IPAGDIWANG ANG TAGUMPAY NINA LAPULAPU

Ilang araw na lang ay atin nang ipagdiriwang

Ang ikalimandaang taong tagumpay sa Mactan

Halina't pagpugayan ang kanilang katapangan

Naitaboy agad ang mananakop na dayuhan

Sa pangunguna ng Portuges, ngalan ay Magellan

Mabuhay ka, Lapulapu, sa kabayanihan mo

At ng mga kasama mong mandirigmang tumalo

Sa mga dayuhan sa labanan sa Mactan dito!

Taospusong pagpupugay sa alaala ninyo!

Limangdaang taong singkad nang nakaraan iyon

Pinigilan n'yo ng apatnapu't apat na taon

Ang pagsakop ng dayo sa di pa ganap na nasyon

Iyan ang esensya bakit kayo dinadakila

Iyan ang mahalaga sa pagbubuo ng bansa

Mabuhay kayo, Lapulapu! Mabuhay! Mabuhay!

- gregoriovbituinjr.

04.21.2021

* Ayon sa kasaysayan, naganap ang Labanan sa Mactan noong Abril 27, 1521, mahigit isang buwan nang lumapag ang grupo ni Magellan sa Mactan

Ang mga pantry ay pagbabayanihan

ANG MGA PANTRY AY PAGBABAYANIHAN

nalalantad kasi'y kainutilan ng gobyerno

community pantry'y ni-redtag pa ng mga ito

kusa na ngang nagbabayanihan ang mga tao

pagtutulungan na, ni-redtag pa ng mga gago

mag-resign na sa pwesto kayong mga mapanira

aba'y sa West Philippine Sea kayo magsiga-siga

community pantry'y pagbabayanihang dakila

huwag pakialaman kung wala kayong magawa

kapara kayo ng alikabok sa tabi-tabi

mga utak na'y inaagiw, pawang marurumi

o kayo'y langaw na walang silbi kundi sa tae

sa pagre-redtag nyo sa mga community pantry

ipagtanggol ang mga pantry't pagbabayanihan

dahil gobyerno'y palpak kaya ito nagsulputan

- gregoriovbituinjr. 

Ang pamuwat

ANG PAMUWAT

bukod sa aliping sagigilid at namamahay

mayroon pa palang aliping saluwat sa hanay

tila ba timawa noon na naging malayang tunay

na iba sa timawa ngayong kawawa sa buhay

o kaya'y iba talaga ang aliping saluwat

may kalayaan na ang alipin ngunit di sapat

gumagawa sa bukid ng amo ng walang bayad

kundi nakakakain lang, tila paglayang huwad

malaya na siya dahil di na nilalatigo

lumaya dahil ba amo na'y nagpapakatao?

alipin pa rin siyang walang bayad kahit singko

habang nililinang ang bukirin ng kanyang amo

tunay nga bang lumaya o alipin pa ring sadya?

buhay na ba'y umalwan, dama na ba ang ginhawa?

o pamuwat na nagsisilbi'y tunay na dakila?

alipin nang isilang ngunit ngayon na'y malaya?

- gregoriovbituinjr.

* hango sa UP Diksiyonaryong Filipino, Binagong Edisyon, pahina 907

Pagsisikap

PAGSISIKAP

mabuti nang nagsisikap kung di pinapapasok

ang marunong sa pagkamit ng tagumpay sa tuktok

sa pagsisikap ay makakarating din sa rurok

pagkat di lang pulos marunong ang nailuluklok

matulog sa oras upang katawan ay gumanda

walong oras na tulog ay para sa resistensya

tiyakin lamang lagi ang paggising ng maaga

upang makapagbanat na ng buto sa tuwina

pinagsisikapang tunay ang asam na pangarap

magpagal, mag-aral, matuto, magtapos, magsikap

nang sa kalaunan ay maging manggagawang ganap

maging sahurang alipin sa bayang naghihirap

kahit di man makapasok ang sinumang marunong

dahil baka danasin ay pawang kutya't linggatong

pagsikapang buhatin ang sa balikat sinuong

bakasakaling may tagumpay ka ring masusumpong

- gregoriovbituinjr.

Congrats, Golden Cañedo, kampyon sa pag-awit

CONGRATS, GOLDEN CAÑEDO, KAMPYON SA PAG-AWIT

akala ko noong una'y si Sarah Geronimo

ako nga'y mali, siya pala'y si Golden Cañedo

kampyon ng The Clash Season 1, ako'y sumasaludo

kampyon sa kantahan, kaygandang tinig at idolo

napanood ko sa telebisyon, Sarah talaga

ang tinig niya'y nanghahatak, animo'y mahika

deja vu, tulad niya'y kampyon din noon si Sarah

na siya ngang tuntungan sa larangan ng musika

pambato ng Cebu, talagang golden voice si Golden

animnapu't dalawa'y naglaban, siya'y nagningning

nanguna, nagkampyon, tinig niya ang tumaginting

napabalikwas ako sa boses niyang kaygaling

sa iyo, Golden, ang tinig mo'y tunay na marikit

nagbunga ang lahat ng iyong pagpapakasakit

nawa'y magtagumpay ka pa sa mundo ng pag-awit

at kagandahang asal pa rin ay iyong mabitbit

- gregoriovbituinjr.

* kuha ng makatang gala sa replay ng The Clash, na paligsahan sa pag-awit ng GMA 7