Bakit karapatang mag-unyon ay mistulang giyera

pag ikaw ay natanggap na't pumasok sa pabrika
sasabihan kang huwag mag-uunyon sa kanila
bawal daw mag-unyon, ayon pa sa kapitalista
magtrabaho ka lang upang tumubo ang kumpanya

karapatan mong mag-unyon, karapatan mo iyon
kahit na basahin mo pa ang ating Konstitusyon
mabuting kalagayan sa trabaho'y nilalayon
kaya mga manggagawa'y nagtatayo ng unyon

ang manggagawa ang lumilikha ng ekonomya
subalit sa loob ng pabrika'y may pulitika
bakit pag-uunyon ay nagmimistulang giyera
at tinuturing na paglaban sa kapitalista

manggagawa'y tao, at di makinang gagamitin
taong malaya ang manggagawa, at di alipin
katotohanan bang ito'y kayhirap intindihin
ng kapitalistang ang sarili'y diyos ang turing?

iyang karapatang mag-unyon ay pandaigdigan
na kinikilala rin ng maraming bansa't bayan
kaya ang karapatang mag-unyon ay ipaglaban
ng manggagawang kontraktwal, regular, o arawan

- gregbituinjr.

Buhay ng boteng plastik sa sahig ng bus

itinapon siya sa sahig nang siya'y maubos
kaya pagulong-gulong na siya sa loob ng bus
nagtapon ba sa kanya'y wasto ang ugaling lubos
o taong ito sa kabutihang asal ay kapos

sinisipa ng mga pasaherong nakatayo
at nasisipa-sipa rin ng mga nakaupo
pagulong-gulong sa bus na tila ba naglalaro
ngunit napapagod din siya't nais nang maglaho

buhay ng boteng plastik ay tinatapon na lamang
ng kung sinong sa paligid ay walang pakialam
ganyan nga ang buhay na kanilang nararanasan
tinatapon kung saan matapos pakinabangan

naglipana na sa mundo ang milyun-milyong plastik
sa basurahan at dagat sila'y nagsusumiksik
kung may pakialam ka'y huwag magpatumpik-tumpik
ikampanyang tigilan na ang paglikha ng plastik

- gregbituinjr.

Kaysa tumanghod sa telebisyon buong maghapon

di ba't dapat nating ipaglaban ang karapatan
kaysa tumunganga lang lagi tayo sa kawalan
kaysa mangalumbaba't tumanghod sa telebisyon
kaysa manood lang ng kung anu-ano maghapon

di ba't wasto lamang maging bahagi ng kilusan
at nakikibaka upang mabago ang lipunan
kaysa nakatunganga na lang sa buong maghapon
kaysa mga parke't mga mall ay naglilimayon

di ba't magandang may niyakap tayong simulain
upang kaginhawahan ay kamtin ng bayan natin
kaysa naman nagpapalaki lang tayo ng bayag
kaysa nagbabate na lang sa maghapon, magdamag

di ba't mabuti pang kumikilos tayo't aktibo
inaaral natin ang sistemang kapitalismo
nagsusuri't kumikilos na bilang aktibista
ibabagsak ang mapangapi't mapagsamantala

kaysa tumanghod maghapon, lipuna'y pag-aralan
at maging kaisa sa pagbabago ng lipunan
halina't isulong natin ang diwang sosyalismo
at kumilos tayo upang lipunan ay mabago

- gregbituinjr.

Tanaga sa Karapatan

I

karapatang pantao

ay ipagtanggol natin

laban sa tuso, gago,

at sinumang salarin

II

karapatang pabahay

ay ating ipaglaban

demolisyon ay lumbay

para sa matamaan

III

bawat sinasalita

ay ating karapatan

anuman ang winika

puso man ay masaktan

IV

bawat pagpapahayag

ay ating karapatan

di dapat nilalabag

ninuman at saanman

V

tayo’y mag-organisa

at magtayo ng unyon

karapatan ng masa

ay ipagtanggol ngayon

VI

ang karapatan noon

ay kaparis din naman

ng karapatan ngayon

na dapat ipaglaban

VII

huwag kang mamamaril

ng walang paglilitis

huwag ka ring kikitil

may batas at due process

- gregbituinjr.

- Nalathala ang tulang ito sa Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Disyembre 1-15, 2019, pahina 20

Mabuhay ang Laban ng Masa (LnM)!

Laban ng Masa, palaban para sa pagbabago

ang bulok na sistema'y nais palitang totoo

nag-oorganisa't pinatitibay ang prinsipyo

at pinalalakas ang mamamayan at obrero

para sa nagkakaisang layuning sosyalismo

Laban ng Masa, nagtataguyod ng karapatan

ng mga inaapi't pinagsasamantalahan

misyon nitong ibagsak ang sistema ng gahaman

adhikain nito ang pagkakaisa ng bayan

simulain nito ang pagbabago ng lipunan

Mabuhay ang Laban ng Masa! Mabuhay! Mabuhay!

Mabuhay ang mga lider nitong pumapatnubay

sa mga diwa't prinsipyong tangan natin ay gabay!

Sa Laban ng Masa'y taas-kamaong pagpupugay!

Magpatuloy tayong kumilos hanggang sa tagumpay!

- gregbituinjr.

- nilikha at binasa sa get together ng Laban ng Masa na ginanap sa TriMoNa sa Anonas Ext., Lungsod ng Quezon, Disyembre 14, 2019 ng gabi

Ang awiting "Isang Kahig, Isang Tuka"

ANG AWITING "ISANG KAHIG, ISANG TUKA"

Munting sanaysay ni Greg Bituin Jr.

Inilarawan ng awiting "Isang Kahig, Isang Tuka" ni Freddie Aguilar ang buhay ng isang dukha. Halina't tunghayan natin ang awit:

Ako ay isang anak mahirap

Lagi na lang akong nagsusumikap

Ang buhay ko'y walang sigla

Puro na lang dusa

Paano na ngayon ang buhay ko

Sa akin ay walang tumatanggap

Mababa raw ang aking pinag-aralan

Grade one lang ang inabot ko

No read, no write pa ko

Paano na ngayon ang buhay ko

Koro:

Isang kahig, isang tuka

Ganyan kaming mga dukha

Isang kahig, isang tuka

Ganyan kaming mga dukha

Itinulad sa manok na isang kahig, isang tuka, ang buhay ng maralita. Gayuman, maganda ang liriko ng awit pagkat naglalarawan ng buhay. Siya'y anak-mahirap na laging nagsusumikap, subalit pulos dusa ang kanyang nararanasan. Walang tumanggap sa trabaho, dahil mababa ang pinag-aralan. Grade one lang ang inabot, gayong lagi siyang nagsusumikap. Tila patama naman ang liriko ng awiting "Doon Lang" ni Nonoy Zuñiga, nang simulan niya ang awitin sa:

"Kung natapos ko ang aking pag-aaral

Disin sana'y mayron na akong dangal..."

Siyang tunay. Sa panahong ito'y mas pinakikinggan ka pag ikaw ay may pinag-aralan, at mas pinahahalagahan ang pagkatao mo. Subalit kinikilala lang ba ang dangal kung ikaw ay may pinag-aralan? Igagalang ka lang ba dahil nakasuot ka ng barong o necktie?

Sabi nga ng isang tatay, hindi mo kasalanan ang ikaw ay maging mahirap. Kasalanan mo pag namatay kang mahirap. Kaya ang iba ay nagsusumikap makaahon sa kahirapan. Subalit hindi lahat ng mahirap ay nagnanais magbago ang buhay, tamad, palainom.

Sa totoo lang, ang kahirapan ay di lang dahil ipinanganak kang mahirap, kundi may mga nagpapahirap, may nag-aangkin ng yaman ng lipunan na dapat ay para sa lahat. Kailangan nating baguhin ang bulok na sistema ng lipunan. Maging aktibo tayo sa pagbabago ng ating kalagayan, at pagpawi ng pribadong pag-aaring dahilan ng kahirapan sa lipunan.

* Ang sanaysay na ito'y nalathala sa Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Disyembre 1-15, 2019, p. 15.

Kaginhawahan ng bayang tinubuan

"Kaya, O, mga kababayan! Ating idilat ang bulag na kaisipan at kusang igugol sa kagalingan ang ating lakas sa tunay at lubos na pag-asa na magtagumpay sa nilalayong kaginhawahan ng bayang tinubuan." ~ Gat Andres Bonifacio

kaginhawahan ng bayang tinubuan, pangarap

ng bayaning Gat Andres Bonifacio, na nangusap

sa mga kababayan habang sila'y nangangalap

ng sasapi sa Katipunan kahit mahihirap

kaginhawahan ng bayang tinubuan, layunin

ng Katipunan at mga Kastila'y patalsikin

sa tinubuang natigmak ng dugo kung isipin

Katipunang ginhawa ng bayan ang simulain

ibinukas nila sa atin ang pakikibaka

di pa tapos ang laban ni Bonifacio't ng masa

igugol ang ating lakas sa lubos na pag-asa

upang ginhawa ng bayan ay kamtin ng balana

mabuhay ka sa bilin mo, Gat Andres Bonifacio!

kung noon, nilabanan ninyo'y mapangaping dayo

kami naman ay nakikibakang taas-kamao

laban sa sistema at mapang-aping Pilipino

nilabanan ninyo noon ang mga dayong bugok

ang binabaka naman namin ay sistemang bulok

hangad na uring manggagawa'y ilagay sa tuktok

at ibagsak ang burgesya't elitistang dayukdok

- gregbituinjr.